院長的話


文�國家海洋研究院院長 陳璋玲

臺灣四面攏是海，海洋毋但是咱生活的所在，嘛承載著一代閣一代臺灣人的記持。佇佮海洋相伴的歲月內底，海翁佮海豬一直是臺灣海洋故事內底重要的角色。對原住民族流傳落來的海翁傳說，到人佮海翁、海豬佇海頂的相拄，??毋但是海洋內底的生物，嘛成做臺灣海洋文化的一部分。

隨著時世變化，人佮海翁、海豬相處的方式嘛一直咧改變。對早期利用靠沙的海翁、海豬，到掠海翁漸漸發展做一項產業；綴著保育觀念興起，人開始重新認捌海翁佮海豬，對掠捕佮利用，一步一步行向保護、研究佮救援。看海翁活動的發展，嘛予人有另外一種親近海洋、認識海翁佮海豬的方式。這段轉變，毋但是歷史的一部分，嘛是臺灣海洋文化轉變的重要見證。

《海洋之歌──臺灣kah鯨豚e歷史故事》用充滿想像的故事，??囡仔行入這段歷史。故事內底，有守候海島千年的巨靈，有隨著烏流來的海翁、海豬，嘛有曾經沉寂、後來閣再響起的海洋之歌。透過故事佮圖像，阮希望囡仔毋但會當認捌海翁、海豬，嘛會當看著??按怎走入臺灣人的生活，和人按怎佇時代變化中，重新思考佮海洋鬥陣的方式。

對國海院來講，記錄這段人佮海翁、海豬的歷史，毋但是欲保存過去，嘛是欲予咱重新了解海洋佮家己的關係。當人對掠捕佮利用行向保護佮共存，改變的毋但是咱對海翁、海豬的態度，嘛反映出臺灣海洋文化的轉變。希望透過這本繪本，予這段珍貴的歷史予較濟人看著，嘛予屬於臺灣的海洋故事繼續流傳落去。

希望囡仔翻開這本冊的時陣，會當聽著一首屬於臺灣海洋的歌；佇認捌海翁佮海豬的同時，嘛感受海洋的美好，了解尊重自然、寶惜海洋的重要。願這首海洋之歌，對過去唱到今仔日，嘛佇每一?囡仔心內留落溫柔閣久長的回聲。