香港二樓書店 > 花的目屎

自序

走揣台語詩的心情

　　出版過七十本的華語文學作品以後，即馬這本《花的目屎》是阮第三本的台語詩集。佇過去出版台語詩集《八卦山》、《番薯園的日頭光》的同時，攏總寫過六本台語囝仔詩歌，這詩歌主要想欲保留台灣的語言文化，予台灣囝仔透過唱歌的方式，學習家己的母語，所以宋澤萊曾經講：「……康原的台語文學較多根、莖這個部分，這是因為他在台語的歌謠和童詩上奮鬥很久，留下了諸如《逗陣來唱囡仔歌》、《台灣囝仔的歌》這些非常基本的台語文學根基的書籍，其成就早就受人肯定。」這就是阮詩的語言受著肯定的原因。

記得阮咧寫《八卦山下詩人林亨泰》的傳記時，林先生講過：「『台語』乃構成『台灣文學』最自然而首要的基本條件……我深深覺得自己用日文寫過詩，用華語寫過詩，就是未曾用自己的母語寫過詩，這是自己詩創作的一大遺憾。」這句話予阮一種啟示，所以阮著立誓一定愛用母語寫一寡詩集。開始用母語寫詩的時，受著真濟困難，不管是用字的問題，亦是揣無妥當的語詞佮意象，寫袂出洽意的詩句，傳袂出台灣人的精神。經過一段時間的拍拚，慢慢完成一首一首的台語詩。

　　《花的目屎》這本詩集，攏總有三十二首的詩，分做兩輯：第一輯「咱的土地，阮的詩」有十七首，寫出咱土地上發生的代誌，親像社會運動中，咱台灣人的心聲，亦閣有寫出台灣作家的意志，彼種不屈辱的抗議精神，維護台灣人佇這塊土地上的生存價值。親像〈情人節彼一工〉這首詩阮寫著：

　　……你穿一領紅色的運動衫

　　向阮堅強來表示

　　決定嫁入阮的家園

　　嫁予美麗的田庄

　　咱期待起一間真正

　　屬於台灣人的厝宅創出

　　自由民主的時代……

　　正手擲著拳頭母

　　向兄弟姊妹來表示

　　潦落去走揣家己掌握的

　　權力福爾摩沙的

　　新世紀……

　　有人挺身出來承擔台灣的未來，共同來宣誓獻身予美麗的島嶼。嘛有寫著阮的故鄉的代誌。

　　

　　輯二：「走揣詩的旅行」攏總十五首，有透過國外的旅行，走揣創作的心情，親像〈坐飛機，走揣詩〉的長詩，是寫去歐洲旅行，探訪外國人的歷史文化佮生活，借用外國的地景，寫出對台灣的心情，是「借景抒情」的寫作技巧，向望有向外學習的機會，來充實家己的不足，看別國無仝款的建築、整齊的街頭秩序、紳士人優雅的氣質，咱愛做自我的反省，去學習別人的優點。看別人按怎保護好的文化？按怎傳播文學精神？另外〈走揣詩的旅行〉是坐火車環島旅行，到每一個地方就將在地的作家、藝術家、音樂家寫入去詩中，予人也凍感覺著在地文化特色；親像屏東有陳達的歌聲、宜蘭有黃春明的「鑼聲」佮《看海的日子》中的白梅的地方風格。但是嘛有一寡土地上發生的代誌，需要用詩去批判，阮嘛提出磺溪為公理佮正義的文化精神，去維護台灣的最大利益。

　　用母語寫出台灣人的心情，傳達台灣精神，成就有台灣主體意識的文學，是阮走揣台語詩《花的目屎》上主要的目的；保留母語除了講以外，需要有新生命語言的創作，用詩來寫作予新的語詞，一代一代傳落去，這是阮出版《花的目屎》的向望。