自序
踏話頭:捽著一首詩
王羅蜜多
定定佇大目降的虎頭埤行踏,遐是會當予我敨開身心靈的所在。
我踅湖一輾大約一點鐘,若準閣坐落來看冊寫物件,就愛延甲兩點鐘。退休了後時間自由兼免門票,我就更加濟去矣。
踅湖,有時會看著別人傱甲像走馬?,大氣喘袂離。怹講,緊行,較有運動著。毋過,我從來無咧注意家己的跤步,只是一直行,頭殼有時空空,有時四界相,幌咧幌咧,有行東西甩南北的爽快。
四常,佇行踏的中間,一寡字句浮上頭殼頂,起先那有那無,落尾直直明朗起來。親像魚仔已經咧食餌,就等待適當的時機共釣起來。這時陣,若看著路邊有柴椅就愛坐落來,搜身軀的橐袋仔,揣出一張紙條仔,可能是水單電單,可能是拆開的批囊。
按呢,一尾活靈靈的魚仔就落佇紙面。魚仔通常無大尾,三四指爾爾。姜太公釣魚離水三寸,我釣魚是用目尾烏白捽,有時捽上樹尾雲頂,有時捽佇草仔埔,有時閣捽入深深的湖底。捽有捽無不管他,自然就好。
用兩點鐘佮一身軀汗水,捽著一首詩,按呢算是有夠本矣!時常按呢,我就歡歡喜喜來85度C?咖啡。
85度C佇大目降忠孝街的路口,邊仔是新化高中圍牆,正對對徛一尊四面佛,時常有人來求愛情、健康、事業、財運。彼是現實的人生,而佇咖啡邊,我當咧整理的,是噗噗跳的內心。
兩三冬來,按呢產生的詩作真濟,其中有一寡含相片陸續發表佇面冊,多數是臺語詩。相片真濟是截過,取有意味的部分。詩,保留原形。
今年中,共遮詩作整理好勢,想欲出版,拄好臺灣詩學邀集截句出冊,就提出來用矣!其中一部分無超過四行,就直接囥落。超過的,就切一塊好份的來用。如果切出來的無蓋?氣,就閣共xi?g?i一下。
按呢,攏總生出八十首,無濟也無少。準講,有一部分無蓋四序,會當來參加這擺的截句集出版,感覺誠歡喜。佇遮,招汝用唸截句的喙脣,?一杯咖啡!
2017/7/30佇大目降畫室