序
踏話頭
這本冊e內容,是我二十外冬來,佇新北市(以早台北縣)指導台語演講大人組e選手,所使用e教材佮長年累積e經驗,共抾做伙e成果。佇2009年,我第一擺共我集訓選手e資料編做一本講義,名稱就叫做《台語演講有撇步》,這馬欲正式出版矣,因為冊名驚去佮人傷相仝,就謙卑共號做《台語演講三五步》,表示伊干焦是三五步e基本功夫爾。閣因為內容傷濟,共分做上、下兩篇。愛特別感謝e是,佮我同齊訓練選手e同工,因為in予我誠濟啟發佮幫贊,若無?,這本冊就無法度出版矣。
當然,這本冊e內容,除了我家己長久以來累積e經驗佮看法,嘛愛感謝真濟幕後英雄。?是提供我智識e專家學者佮各種網站e資料,其中有歷史、生態學家e著作,文學家e作品,嘛有文化性網站e豐富內容,以及政府網站e正確資訊。遮e著作佮網站,攏予我佇咧編寫這本冊、共資料改寫做台文e時,有真大e貢獻。特別是佇演講e「言辭證據」這方面e資料蒐(soo)集,咱攏無法度避免愛去參考遮e智識佮資訊。
想欲出版這兩本冊有三?動機:幫助參加台語演講e選手,共指導演講e老師佮家長鬥相共,以及為推展台語文盡一份力。三?動機攏誠單純,毋過目標真懸,是毋是有才調達成,攏愛試看覓才會知。
其中,第三點特別困難。因為佇推展台語文e過程中,咱會拄著:學生袂曉講、家長無重視、老師應付、母語e語言環境愈來愈?,以及政客、教育官員對本土語言無理念,四常放屁安狗心,予咱聽甲咬牙閣切齒,強欲去舂壁!
我想,欲救台灣話,上重要e干焦三條路:
第一條,對幼稚園到高中攏愛有母語e課程,逐禮拜三節課以上,並且欲升高中佮大學,攏愛認證一種本土語言,及格e才有資格升學。這是政策問題,需要有智慧佮決心e本土政權,做政治解決。
第二條,予母語有實用e價值。愛立法規定,欲去原住民、客家人、抑是h?-lo人佔多數e縣、市、鄉、鎮服務e公務人員,包括老師、警察、稅務、鐵路局、地政人員、公所辦事員等等,攏愛通過當地本土語言中高級以上e認證。無,就袂當錄取。
第三條,予母語生活化、教育化。無論是佇家庭、教室、抑是公共場合,攏愛慣勢講母語,老師上課嘛用母語教學(這就是「浸水式」e教學),按呢才有法度營造(ing-ts?)較好e母語環境。若無,本土語言、咱e族語,會漸漸無去e運命,是一件無法度挽回e代誌矣!
出版這本冊,毋敢有傷濟向望,講按呢就有夠額矣。
?
Lau Bing-sin???? 2018.12