香港二樓書店 > 千金譜2.0：改換新意講台灣

推薦序

老歌新詞新滋味──序《千金譜2.0》

何信翰（臺中教育大學台灣語文學系副教授）

　　《千金譜》是早期台灣、廈門流傳真普遍的囡仔捌字冊（蒙書），真濟到今猶定定咧使用的俗諺語，親像「竹篙鬥菜刀」等等，攏是對這本冊出來的；冊內面講著的真濟傳統事物的名稱，更加是現代人重要的參考根據─親像義美食品包裝頂面的「虎蹄」（滸苔hoo-thi）kah「吉紅」（桔紅kiat- ang）的由來，學者咧考證的時，就有參考《千金譜》的記載。

　　雖罔有重要的意義，總是《千金譜》創作的時代離這馬已經有一段時間，逐家的生活型態kah日常用品的項目早就已經改變，所以這馬 koh 讀千金譜，除了文獻意義以外，其實也已經無真濟實用的價值。

　　就是考慮《千金譜》的歷史意義kah現代生活的進步、改變，徐大年老師用《千金譜》的內容方向kah創作文體成做基礎，創作《千金譜2.0》。這本冊連附錄攏總有15章，對「台灣山水縣市」寫到「都市草地」；對「禽獸蟲豸」、「菜蔬果子」寫到「三C世界」、「生活中的日本話」，共當今台灣社會的真濟面向攏總包羅佇冊內面。會當講這本冊就是當代台灣社會的「博物誌」。

　　台灣的土地面積雖罔無算是蓋大，總是族群多元，語言、文化的種類真豐富。佇這方面，這本《千金譜2.0》的蒐集是真豐富，親像佇〈禽鳥〉這章內面，作者共屏東kah彰化對仝一種鳥仔的無仝稱呼：「山後鳥」kah「南路鷹」攏列出來，表現台灣無仝所在的，因為地形產生的無仝稱呼；佇〈宗教活動〉這章內面，毋若列出逐家攏知的內門宋江陣，就連當地真有特色的「總鋪師（tsong-phoo-sai）」也列佇內面，會當講對內門有深入的蒐集kah了解；最後，佇語言方面，也列出日本、荷蘭遮?國家的語言，對台語詞彙的影響。對頂面有講著和其他真濟無講著的細節所在，讀者攏會當看出作者對台灣各地的了解，以及佇寫這本冊的過程當中所落的功夫。

　　傳統 kah 現代 beh 按怎結合，才會當佇保存傳統文化的仝時，也會當符合當代社會的需求和現代人的興趣，通來增加當代讀者的閱讀意願？這是真濟文字/文化工作者一直攏 leh 思考的問題。這本冊的嘗試是成功的，相信佇逐家閱讀的過程，一定會當感受著一直溢來的訊息，和吟誦的趣味。真心推薦予逐家。

新時代也值千金

李知灝（國立中正大學台灣文學與創意應用研究所副教授兼所長）

　　「字是隨身寶，財是國家珍。」這是古早《千金譜》踏話頭留落來的名言。早期台灣捌字的人少，喙講的話雖然是金言玉語，毋捌字就無法度記錄、傳播出去，無法度應用佇商業、工業、教育等層面。所以《千金譜》的作用，除了個人智識的提升，更加是國家運作袂使欠缺的基礎。這馬教育普及，捌字的人較濟，毋過學習的攏是華語系統，失去用台語讀寫的能力，煞顛倒講是台語無字。實在是毋知較早教育囡仔所用的《千金譜》，就是用台語來讀、來捌字。

　　毋過語言隨時代變化，新的物產佮行為就會產生新的語詞，教育囡仔的讀本嘛應該綴時代改進，因此才有這本《千金譜2.0》。這本冊除了自古以來就有的山川、民俗、動植物以外，閣有現代的交通、醫療、3C 等等，會使講是進化版本的《千金譜》。予囡仔咧唸讀的過程，自然進入台語的環境，同時學習語言佮文字，提升台灣的文化。

　　俗語講：「人不露才。」嘛有人講「人不露財」，猶閣有人講笑詼講「人不露臍」。人露臍會感冒，若露財會危險，為著文化發展來「露才」，應該是逐家所樂見的。大年這本《千金譜2.0》表現伊創作的才華，嘛向望會當予台語教學閣較趣味，予逐家攏知影台語相是有綴時代進化、發展的活語言。

「千金譜裡用意深」──序徐大年《千金譜2.0》

陳瀅州（國立中正大學台灣文學與創意應用所兼任助理教授）

　　《千金譜》是古早認字啟蒙的教材，除了捌字，內容有衣、食、住、行、信仰、行業、記數、契約等等幾若十種主題，會當講是包山包海，是早前誠普遍流通的蒙書。不而過，現代教育體制發展了後，遮爾有意義的冊煞漸漸無夆重視，嘛罕得有人咧使用，實在是真可惜！大年佮伊的指導教授知灝來邀請我替伊的創作論文口試，一聽著《千金譜2.0》，我隨就共允矣！

　　《千金譜2.0》既然號名「2.0」，就是以原底《千金譜》為基礎，長短句、音節節奏無變，內容對清道光閩南地區變成符合現今台灣社會，用字變較淺小可。〈序言〉以外，設定十一?主題，內底有台灣特色的山水、民俗、節日、動植物，嘛有現代社會的城鄉、交通、醫療、3C，另外也有外來語的日本話。上特別的是〈生活中的日本話〉，這是《千金譜2.0》才有的創意安排。台灣受過日本統治，日語嘛早就濫入來台語內底，成做咱日常生活當中定聽捷講的台語外來語，佇大年的手中嘛成做「千金譜」的一部分。上尾，我引用大年佇〈序言〉的「千金譜裡用意深」來做這篇的題目，咱若看這本《千金譜2.0》，毋但認捌台語字詞佮台灣文化，閱讀過程中嘛會使欣賞永早《千金譜》的音韻節奏，共同來熟姒傳統的蒙書、新時代的創作！

自序

踏話頭──阿年仔踅踅唸

　　《千金譜》是較早台灣民間流傳上闊、上出名的啟蒙教材。彼當時厝裡較散赤、無法度去學堂讀冊的人就會使讀《千金譜》，讀熟了後認捌千外字，就聽好揣頭路共頭家記數矣。我想彼當陣若有排行榜，伊應該嘛會當衝起去賣上好的暢銷書啦！《千金譜》的特色就是參科舉考試的四書五經攏用文音來讀完全無仝，伊是用大量的白話音所寫、有湊句的韻文。閣來是文章內底紀錄真濟當時泉州生活物件的名詞。

　　真可惜，佇咱國家開始有義務教育了後，逐家就漸漸共這本重要的冊放袂記得囉，到今甚至誠濟少年輩嘛毋知影有這本冊。阿年仔寫這本《千金譜2.0──改換新意講臺灣》，就是想欲予逐家會使閣注意著這本冊，而且用臺灣人的角度、講臺灣台語、寫臺灣在地的生活語言。當然啦，上重要的是我延續《千金譜》的精神，全篇是長短句結構、有湊句的韻文。

　　既然是韻文，按怎念就真重要矣，愛有節奏感、閣愛諧韻，念起來毋才會氣，所以文章內底攏有羅馬拼音。不而過臺灣雖然所在無蓋大，各地台語腔口卻是有真濟方音差，所致標音的時陣我是先用通行腔來標，毋過拄著欲湊句諧韻就會用韻跤音。比論講「病」原底標p?nn，為著諧韻就標p?nn。「羹」原底標k?nn，為著諧韻就標k?nn。「暝」原底標mi，為著諧韻就標me。

　　另外一種狀況是：教育部臺灣台語常用詞辭典標的音，交老輩台灣人慣習講的音無仝，我選擇保留老輩原來的聲音，佇後尾才標註解說。比論講「強欲」教育部辭典是標kiong，我保留老輩giong的音。「羅漢跤仔」教育部辭典是標lo，我保留老輩l?o的音。挹墓粿教育部辭典是標ip，我保留老輩ioh的音。

　　閣來，講著予我上頭疼的「番外篇∼生活中的日本話」，日本話佇台語內底有日本漢字日本音、日本漢字台語音、有台羅拼音煞無字……一逝漢字一逝台羅拼音，是欲按怎表示較袂予讀者看甲目睭花、頭殼霧嗄嗄？最後決定有漢字就下跤加一巡，無字就用台羅拼音來解決。

　　當然，為著欲予台文好的、無遐邇好的、完全未曉台文但是有興趣的讀者，攏會使了解《千金譜2.0》到底是咧講啥貨，我嘛真貼心為逐家獻聲錄音，只要提手機仔掃一下QR Code，就會使聽著我的牛聲馬喉為恁念冊，若是共恁驚著，我佇遮先共逐家會失禮，（所以奉勸逐家千萬毋通欲睏才來聽喔！）為著傳承台語文化，替台語出版冊加入新血，請恁著愛做伙鬥支持喔！感謝！努力！

?